Neh 8 | Ndebele | STEP | Bonke abantu basebebuthana njengamuntu munye egcekeni eliphambi kwesango lamanzi ; bakhuluma kuEzra umbhali ukuletha ugwalo lomlayo kaMozisi, iN kosi eyayiwulaye uIsrayeli .

Nehemiah 8

UEzra ufundela abantu umlayo

1 Bonke abantu basebebuthana njengamuntu munye ^a egcekeni eliphambi kwesango lamanzi ^b; bakhuluma kuEzra umbhali ukuletha ugwalo lomlayo kaMozisi, iNkosi eyayiwulaye uIsrayeli ^c. 2 UEzra umpristi wasewuletha umlayo phambi kwebandla, kusukela kowesilisa kusiya kowesifazana ^d, laye wonke owaqedisisa ukuzwa, ngosuku lokuqala lwenyanga yesikhombisa ^e. 3 Wasebala kuwo phambi kwegceke ^f eliphambi kwesango lamanzi kusukela emadabukakusa kwaze kwaba semini enkulu, phambi kwabesilisa labesifazana labaqedisisayo; lendlebe zabo bonke abantu zazingasegwalweni lomlayo ^g. 4 UEzra umbhali wasesima phezu kwendawo ephakemeyo yamapulanka ababeyenzele loludaba. Leceleni kwakhe kwakumi oMathithiya loShema ^h loAnaya ⁱ loUriya ^j loHilikhiya loMahaseya ngakwesokunene sakhe ^k; langakwesokhohlo sakhe oPhedaya, loMishayeli, loMalikiya ^l, loHashuma ^m, loHashibadana, uZekhariya ⁿ, uMeshulamu ^o. 5 UEzra wasevula ugwalo phambi kwamehlo abo bonke abantu; ngoba wayengaphezu kwabantu bonke ^p; lapho eluvula, bonke abantu basukuma. 6 UEzra waseyibusisa iNkosi, uNkulunkulu omkhulu ^q. Bonke abantu basebephendula bathi: Ameni, ameni ^r, ngokuphakamisa izandla zabo ^s; basebekhothama, bayikhonza iNkosi ngobuso emhlabathini ^t. 7 OJeshuwa ^u, loBani ^v, loSherebiya ^w, uJamini, uAkubi, uShabethayi ^x, uHodiya ^y, uMahaseya ^z, uKelita ^aa, uAzariya ^ab, uJozabadi ^ac, uHanani ^ad, uPelaya ^ae, lamaLevi basebesenza abantu baqedisise umlayo ^af, abantu besendaweni yabo ^ag. 8 Basebebala egwalweni, emlayweni kaNkulunkulu, ngokucacileyo, bechasisa, bebenza bazwisise ekubaleni ^ah.

9 UNehemiya owayengumbusi, lompristi uEzra umbhali, lamaLevi ayefundisa abantu ^ai, basebesithi ebantwini bonke: Lolusuku lungcwele eNkosini uNkulunkulu wenu ^aj; lingalili njalo lingakhali inyembezi. Ngoba bonke abantu bakhala inyembezi lapho besizwa amazwi omlayo ^ak. 10 Wasesithi kibo: Hambani, lidle okunonileyo, linathe okumnandi, lithumele izabelo kongalungiselwanga lutho; ngoba lolusuku lungcwele eNkosini yethu, njalo lingadabuki, ngoba intokozo yeNkosi ingamandla enu. 11 AmaLevi asebathulisa bonke abantu esithi: Thulani, ngoba lolusuku lungcwele, lingadabuki. 12 Bonke abantu basebehamba ukuyakudla, lokunatha, lokuthumela izabelo ^al, lokwenza intokozo enkulu, ngoba babewaqedisisile amazwi ababebazise wona ^am.

13 Langosuku lwesibili kwabuthana inhloko zaboyise zabo bonke abantu, abapristi, lamaLevi, kuEzra umbhali ^an, ukuze baqedisise amazwi omlayo. 14 Basebethola kubhaliwe emlayweni iNkosi eyayiwulayile ngesandla sikaMozisi ukuthi abantwana bakoIsrayeli bahlale emadumbeni ngomkhosi ngenyanga yesikhombisa ^ao, 15 lokuthi bazwakalise bedlulise isimemezelo kuyo yonke imizi yabo ^ap laseJerusalema ^aq besithi: Phumelani entabeni lilethe ingatsha zezihlahla zemihlwathi, lengatsha zezihlahla zamafutha, lengatsha zezihlahla zamamiteli* ^ar, lengatsha zamalala ^as, lengatsha zezihlahla ezilamahlamvu aminyeneyo, ukwenza amadumba, njengokubhaliweyo ^at. 16 Basebephuma abantu, baziletha, bazenzela amadumba, ngulowo lalowo ephahleni lwakhe, lemagumeni abo, lemagumeni endlu kaNkulunkulu ^au, legcekeni lesango lamanzi ^av, legcekeni lesango lakoEfrayimi ^aw. 17 Ibandla lonke lalabo ababebuyile ekuthunjweni basebesenza amadumba, bahlala emadumbeni. Ngoba kusukela ensukwini zikaJoshuwa indodana kaNuni kwaze kwaba yilolosuku abantwana bakoIsrayeli babengenzanga njalo ^ax. Kwasekusiba lentokozo enkulu kakhulu ^ay. 18 Njalo usuku ngosuku kusukela osukwini lokuqala kwaze kwaba lusuku lokucina wabala egwalweni lomlayo kaNkulunkulu. Bawenza-ke umkhosi insuku eziyisikhombisa; kwathi ngosuku lwesificaminwembili kwaba lenhlangano enzulu, njengesimiso ^az.